სამართალწარმოება გაეროს სახელშეკრულებო ორგანოების სტანდარტების მიხედვით

2.1 გაეროს სახელშეკრულებო ორგანოებში საქმისწარმოების განსხვავება სტრასბურგის სასამართლოში დავის წარმოებასთან შედარებით

სესიის მიზანი: მონაწილეებისთვის ინფორმაციის მიწოდება თუ რა დადებითი და უარყოფითი მხარეები აქვს გაეროს ადამიანის უფლებათა დაცვის კომიტეტებში დავის წარმოებას ადამიანის უფლებათა ევროპულ სასამართლოში საქმისწარმოებასთან შედარებით.

მეთოდი: ინტერაქციული ლექცია (60 წთ.)

აღწერილობა: ტრენერი განიხილავს გაეროს ადამიანის უფლებათა დაცვის კომიტეტებსა და სტრასბურგის სასამართლოში საქმისწარმოების მსგავს და განსხვავებულ ასპექტებს. კერძოდ, გაანალიზდება საქმსიწარმოების ყველა ეტაპი და რელევანტური საკითხი, როგორიცაა:

• დასაშვებობის კრიტერიუმები;
• ვადები;
• კომუნიკაციის საშუალებები;
• საჩივრის ფორმალური შემოწმების სიმკაცრე;
• საქმისწარმოების ენა;
• მტკიცებულებების სტანდარტი;
• გადაწყვეტილების სამართლებრივი ძალა;
• გადაწყვეტილების აღსრულების საკითხები.

მეთოდი: პრაქტიკული სამუშაო/დისკუსია (60 წთ.)

აღწერილობა: ინტერაქციული ლექციის შემდეგ მონაწილეებს დაურიგდებათ ჰიპოთეტური ფაბულები, რის საფუძველზეც გაიმართება დისკუსია კონკრეტულ შემთხვევაში უფლებების დაცვის რომელი საერთაშორისო მექანიზმის გამოყენება იქნება მიზანშეწონილი და რატომ.

2.2. რელევანტური პრეცედენტებისა და წყაროების მოძიება

სესიის მიზანი: მონაწილეებმა ისწავლონ საერთაშორისო ორგანოებში დავისწარმოებისთვის აუცილებელი პრეცედენტებისა და მასალების მოძიება.

მეთოდი: ტრენინგი-პრეზენტაცია (120 წთ.)

აღწერილობა: ტრენერი მონაწილეებისთვის გააკეთებს ვიზუალურ პრეზენტაციას როგორ უნდა იქნეს მოძიებული ადამიანის უფლებათა დაცვის საერთაშორისო სასამართლოების მიერ გამოტანილი პრეცედენტები და საერთაშორისო ორგანოების მიერ დადგენილი სტანდარტები. კერძოდ, მოხდება შემდეგი წყაროების ვიზუალური პრეზენტაცია:

• გაეროს სახელშეკრულებო ორგანოების მიერ გამოცემული ზოგადი კომენტარები;
• გაეროს ადამიანის უფლებათა დაცვის ორგანოების თემატური დოკუმენტები;
• გაეროს სახელშეკრულებო ორგანოების მიერ გამოტანილი გადაწყვეტილებების საძიებო სისტემა;
• სტრასბურგის სასამართლოს მიერ გამოტანილი გადაწყვეტილებების საძიებო სისტემა;
• ადამიანის უფლებათა ევროპული სასამართლოს მიერ შემუშავებული თემატური დოკუმენტები;
• ცალკეული ადამიანის უფლებების მიხედვით ევროსაბჭოს მიერ შემუშავებული სახელმძღვანელოები.

ვიზუალური პრეზენტაციის დროს განსაკუთრებული ყურადღება დაეთმობა პრეცედენტების საძიებო სისტემების დეტალურ ანალიზს, რათა ტრენინგის მონაწილეებმა შეძლონ სასურველი გადაწყვეტილებების მოძიება ისეთი კრიტერიუმების მიხედვით, როგორიცაა:

• საკვანძო სიტყვები;
• გადაწყეტილების მიმღები ორგანო;
• ენა;
• მოპასუხე სახელმწიფო;
• დარღვეული მუხლი/ადამიანის უფლება;
• კონკრეტული სამართლებრივი თემატიკა;
• გადაწყვეტილების გამოტანის თარიღი/პერიოდი;
• საჭირო ფრაზების კომბინაცია.

2.3 საქართველოს მიმართ გამოტანილი გადაწყვეტილებები

სესიის მიზანი: განხილულ იქნეს გაეროს სახელშეკრულებო ორგანოების მიერ საქართველოს მიმართ გამოტანილი გადაწყვეტილებები და გაანალიზდეს მომჩივნისა და სახელმწიფოს მიერ დაშვებული შეცდომები.

მეთოდი: დისკუსია (120 წთ.)

აღწერილობა: ტრენერი მონაწილეებთან ერთად გაანალიზებს გაეროს ადამიანის უფლებათა დაცვის კომიტეტების მიერ საქართველოსთან მიმართებით განხილულ ყველა საქმეს. კერძოდ, საქართველოსთან მიმართებით გაეროს სახელშეკრულებო ორგანოებში სულ განხილულია 11 საქმე. აქედან, მიმდინარეა 5 საქმე, ხოლო 6 საქმეზე წარმოება დასრულდა (5-ზე დარღვევა დადგინდა, ხოლო 1 საქმე გამოცხადდა მიუღებლად):

• ადამიანის უფლებათა კომიტეტი – დასრულებულია 3 საქმე. მიმდინარე საქმე არ არის;
• ქალთა წინააღმდეგ დისკრიმინაციის ყველა ფორმის აღმოფხვრის კომიტეტი – დასრულებულია 1 საქმე და მიმდინარეა 2 საქმე;
• ბავშვის უფლებათა კომიტეტი – მიმდინარეა 1 საქმე;
• წამების წინააღმდეგ კომიტეტი – დასრულებულია 2 საქმე და მიმდინარე აგრეთვე 2 საქმე;
• რასობრივი დისკრიმინაციის აღმოფხვრის კომიტეტი – არ ყოფილა საჩივარი წარდგენილი.

დისკუსიის ფარგლებში გაანალიზდება როგორც დარღვევის დადგენის საფუძვლები, აგრეთვე მომჩივნების პრეტენზიების არ დაკმაყოფილების მიზეზები.